هتتصدمي لما تعرفي ان في حوالي 2368 نوع من البكتيريا بتعيش في السرة لوحدها ، ويمكن اكتر كمان ، ومع ذلك بيتم اهمال نضافتها ، كمان استخدام اعواد القطن لتنضيف شمع الاذن خطر ومش ضروري ، ولو دورنا اكتر هنلاقي ان في اجزاء كتير في الجسم بنضفها بشكل غلط طول الوقت وبنتسبب في اضرار اكتر من المنافع ، والنهاردة في بنات حوا هنقولك الطرق الصحيحة لتنضيف اجزاء الجسم ، وهنتعرف كمان على طريقة اضافية للتنضيف الآمن لو عاملة بيرسينج.

الطرق الصحيحة لتنضيف اجزاء الجسم:

1- السرة:

معظمنا عموما ياما بنتجاهل نضافة السرة او بنضفها بطريقة غلط ، المفروض انك تنضفي السرة مرة واحدة في الاسبوع وبطريقة محددة ، اغمسي عود قطن في الكحول واستخدميها لتنضيف الاجزاء الداخلية من السرة ، كرري مسح السرة لحد ما عود القطن يخرج نضيف ، بعدها استخدمي عود قطن جديد للتخلص من الكحول ، واتجنبي استخدام اللوشن في منطقة السرة.

2- الاذن:

استخدام ضوافرك او اي اداة مدببة لتنضيف شمع الاذن خطر ومحظور تماما ، الطريقة الصحيحة لتنضيف الاذن انك تحطي كام نقطة زيت الاطفال او الجلسرين لتنعيم الشمع وممكن تستخدمي محلول ازالة شمع الاذن من الصيدلية ، وبعد يوم او يومين صبي ماية دافية في الاذن باستخدام قطارة او سرنجة ، وبعدها ميلي راسك عشان تخرجي كل الماية من الاذن ، وامسحيها بفوطة ، كرري العملية دي حسب الضرورة ، ممكن كمان تستخدمي عود قطن لتنضيف المنطقة الخارجية من الاذن بس.

3- اللسان:

حسب الخبراء ، كشط اللسان هو الطريقة الاكتر فعالية لتنضيفه ، اللسان بيحتاج للتنضيف زي الاسنان بالظبط ، باستخدام فرشة الاسنان او كاشط اللسان ابداي من الجزء الداخلي من اللسان وادفعي لبره ببطء لحد طرف اللسان مع ضغط خفيف ، ولو حسيتي برغبة في التقيؤ ، اتجنبي ده عن طريق ظبط وضع كاشط اللسان في وضع مريح اكتر ليكي.

4- الاكواع:

لتجنب تراكم خلايا الجلد الميتة اللي بتأدي لاسمرار الاكواع ، ينصح بتقشيرها مرة او مرتين في الاسبوع ، تقدري تستخدمي مقشر بمكونات طبيعية من البيت او مقشر جاهز ، ولكن المفتاح هنا هو الفرك بحركات دائرية بالراحة من غير عنف ، لان الضغط الزيادة هيأدي لزيادة المشكلة مش حلها.

5- فروة الراس:

وجود تراكمات على فروة الراس ممكن تحصل بسبب خلايا الجلد الميتة او حتى الاستخدام الزايد لمنتجات الشعر ، لتنضيف فروة الراس بطريقة صح ، اشطفي شعرك بالكامل بالماية قبل استخدام الشامبو ، وبعدها اخلطي الماية مع الشامبو بتاعك وحطيه على فروة راسك ، والبلسم وزعيه من اول نص الشعر للاطراف بس وابعدي عن فروة الراس.

6- الوجه:

الصابون والغسول الرغوي بيسببوا جفاف البشرة ، عشان كده الافضل انك تتجنبيهم ، بدالهم استخدمي غسول خفيف مع الماية الفاترة لغسل بشرتك ، وسيبي الغسول على البشرة لمدة 60 – 90 ثانية قبل غسله بالماية.

7- الضهر:

الضهر يعتبر اصعب منطقة لتنضيفها لاننا غالبا مش بنطول كل الاماكن ، وعشان تتأكدي انك تنضفي كل مكان فيه بشكل صح ، ابدأي الاول بالتنضيف الجاف باستخدام فرشة بايد طويلة ، بعدها استخدمي ليفة طويلة او شريط تقشير.

– طريقة تنضيف السرة لو عاملة بيرسينج:

افضل طريقة للتنضيف والعناية بمكان البيرسينج ، هي باستخدام المحلول الملحي ، الضغط الخفيف بالماية الدافية مع الملح هتنضف المكان من البكتيريا وخلايا الجلد الميتة وهتحفز تدفق الدم في المنطقة.

استخدام موبايلك في الحمام ممكن يسبب لك المشكلة دي!

اضرار استخدام الموبايل في الحمام