العلاجات الطبيعية مفيدة لما تكوني مش هتقدري تاخدي ادوية طبية في فترة الحمل ، العلاجات المنزلية هتساعدك على علاج معظم الاعراض المزعجة اللي بتظهر مع الانفلونزا ونزلات البرد ، والنهاردة هنتعرف مع بعض على العلاجات الطبيعية اللي ممكن تستخدميها لعلاج البرد اثناء الحمل.
اثناء الحمل الجسم بيخفض آليه دفاعه لتجنب اعاقة نمو الجنين ، وده بيسبب نزلات البرد المتكررة ، ومن هنا العلاجات الطبيعية هتكون مفيدة ليكي ، لتجنب استهلاك الادوية بشكل عشوائي خصوصا في ال 3 شهور الاولى من الحمل.
8 علاجات منزلية فعالة لنزلات البرد اثناء الحمل:
1- الترطيب:
الحفاظ على رطوبة الجسم مهم جدا اثناء الحمل وبيزيد اهميته اكتر لو بتعاني من نزلات البرد خلال الفترة دي ، الترطيب هيساعدك على تخفيف المخاط وتقليل الاحتقان ، بالاضافة ان الدراسات اثبتت ان شرب السوايل الدافية بيساعد على تخفيف سيلان الانف, التهاب الحلق, البرودة, التعب, العطس, الكحة ، تقدري تحافظي عى رطوبتك والتخلص من احتقان الانف عن طريق شرب 8 – 12 كوباية ماية فاترة / سخنة بالاضافة للمشروبات الدافية التانية.
2- العناصر الغذائية المعززة للمناعة:
العناصر الغذائية زي فيتامين سي, فيتامين أ, فيتامين د, فيتامين هـ, الحديد, السيلينيوم, الزنك, مضادات الاكسدة هتساعد على تعزيز المناعة اللي هيساعدك على تسريع عملية الشفاء ، والابحاث اثبتت ان فيتامين سي, وفيتامين د, والزنك هما الاكتر فعالية في تقصير مدة نزلات البرد وتقليل شدة اعراضها ، تقدري تختاري فيتامين ما قبل الولادة اللي بيحتوي على كل العناصر الغذائية الدقيقة الاساسية بعد استشارة الدكتور ، وتقدري كمان تحصلي على العناصر الغذائية عن طريق الاطعمة الغنية بالعناصر الغذائية زي الجزر, الفلفل الحلو, بذور القرع, الفراولة, المانجا, الكرنب, الشمام, براعم بروكسل, والاسبارجوس.
3- شوربة الفراخ:
من زمان بيتم استخدام شوربة الفراخ كعلاج منزلي لنزلات البرد ، والدراسات اثبتت ان شوربة الفراخ بتساعد على تقليل اعراض نزلات البرد الشائعة ، وتأثيرها بيكون اكتر فعالية في تخفيف احتقان الانف من تأثير السوايل السخنة.ممكن تحضري شوربة فراخ خفيفة تساعدك في علاج نزلات البرد اثناء الحمل ، دوبي معلقة زبدة في حلة عى النار وضيفي لها بصل اخضر مفروم ناعم وكوبايتين فراخ متقطعة قطع صغيرة ، اخلطي المكونات وقلبيها مع بعض كويس لحد ما لونها يتحول للون البني ، وبعدها ضيفي لها الماية المغلية وسيبيها على النار 10 دقايق ، وكده الشوربة تبقى جاهزة.
4- عصير الاناناس:
ثبت ان البروميلين وهو واحد من المكونات النشطة في الاناناس ، انه ليه تأثير قوي مضاد للالتهابات ، ومذيب للبلغم ، وده معناه انه هيساعد على تخفيف التهاب الحلق واحتقان مجرى الهوا ، عشان تحضري عصير اناناس فعال لعلاج نزلات البرد ، هاتي كوباية من عصير الاناناس ضيفي لها رشة من الملح والفلفل الاسود ومعلقة كبيرة عسل.
5- الزنجبيل:
مع المركبات النشطة في الزنجبيل زي الجينجيرول والشوجول ، يعتبر مكون قوي مضاد للالتهابات والفيروسات ومضاد للبكتيريا ومضاد للاكسدة ، تقدري تمضغي قطعة من الزنجبيل الطازة مع رشة ملح او شوية عسل ، او تقدري تعملي شاي الزنجبيل عن طريق غلي قطعة زنجبيل متقطع او مبشور مع كوباية ماية.
ممكن كمان تصبي كوباية ماية سخنة على باكيت زنجبيل مجفف وسيبيه منقوع دقايق قبل شربه.
6- الكركم:
الكركم زي الزنجبيل من الحاجات الطبيعية اللي بتستخدم لعلاج الكحة ونزلات البرد والالتهابات ، والكركم يعتبر واحد من افضل العلاجات العشبية للصحة بشكل عام ، الكركم بيحتوي على الكركمين وهو مضاد قوي للفيروسات ومضاد للاتهابات ومضاد للاكسدة ، وبيساعد على تعزيز المناعة ، وده بدوره هيساعد على محاربة العدوى ، وتأثيره المضاد للالتهابات هيساعد على تهدئة الحلق المتهيج وبيقلل من احتقان الانف.
ضيفي معلقة صغيرة من الكركم البودر مع رشة من الفلفل الاسود لكوباية لبن دافي للحصول على مشروب مهديء ، او ممكن تعملي غرغرة بالماية والملح باستخدام كوباية ماية دافية وضيفي له ½ معلقة صغيرة من الملح والكركم البودر.
7- الراحة:
اثبتت الابحاث ان قلة النوم بتأثر بشكل سلبي على جهاز المناعة وبتلي الشخص معرض اكتر للعدوى ، بما فيهم التهابات الجهاز التنفسي ، والحصول على راحة كافية ما بين 7 – 9 ساعات من النوم هيساعدك على تعزيز جهاز المناعة ومحاربة العدوى ، ارفعي راسك بمخدة او اتنين عشان تخلي النوم مع البرد اسهل ، لو لقيتي نفسك بتصحي بشكل متكرر اثناء الليل ، حاولي تدخلي السرير بدري للحصول على عدد ساعات نوم اكتر ، الحصول على نوم كافي لوحده كفيل انه يحل كتير من المشاكل الصحية ويحسن صحتك العامة.
8- الغرغرة بالماية والملح:
الغرغرة بالماية والملح هتساعدك على تخفيف التهاب الحلق واعراض نزلات البرد ، اثبتت الدراسات ان استخدام غسول الانف والغرغرة بمحلول ملحي ممكن يساعد على تقليل مدة اعراض البرد الشائعة زي سيلان الانف, العطس, الكحة, التهاب الحلق, احتقان الانف ، وبالتالي هتوفرلك راحة سريعة من البرد ، بالاضافة كمان ان الماية المالحة مفيدة في تحسين نضافة الاسنان.
امتى تزوري الدكتور:
لو لقيتي ان الاعراض مش بتتحسن حتى بعد 10 ايام او الوضع بيزيد سوء ، هتحتاجي تروحي للدكتور بتاعك ، وبعض الاعراض المقلقة اللي محتاجة تستشيري الدكتور لو حصلت لك هي.
- ارتفاع درجة الحرارة.
- قشعريرة.
- صعوبة التنفس.
- ارتباك.
- دوخة.
- القيء.
الوقاية من نزلات البرد اثناء الحمل:
لتقليل خطر الاصابة بنزلات البرد اثناء الحمل ، امشي على النصايح دي.
- اغسلي ايديكي بشكل متكرر بالماية والصابون لمدة 20 ثانية ، او استخدمي مطهر الايدين اللي بيحتوي على الكحول.
- اتجنبي لمس وشك بايديكي وهي مش مغسولة.
- الابتعاد عن اي شخص مريض.
- حافظي على نشاطك ، مارسي بعض التمارين الخفيفة للمتوسطة الآمنة اثناء الحمل هتساعدك على تعزيز جهاز المناعة.
- كلي طعام صحي وارتاحي كويس.
- عززي جهاز مناعتك من خلال النوم بشكل كافي والاعتماد على نظام غذائي صحي ومتوازن.
عرضنا لكم زوارنا الكرام أهم التفاصيل عن خبر 8 علاجات طبيعية لعلاج نزلات البرد اثناء الحمل على دوت الخليج فى هذا المقال ونتمى ان نكون قدمنا لكم كافة التفاصيل بشكل واضح وبمزيد من المصداقية والشفافية واذا اردتكم متابعة المزيد من اخبارنا يمكنكم الاشتراك معنا مجانا عن طريق نظام التنبيهات الخاص بنا على متصفحكم او عبر الانضمام الى القائمة البريدية ونحن نتشوف بامدادكم بكل ما هو جديد.
كما وجب علينا بان نذكر لكم بأن هذا المحتوى منشور بالفعل على موقع بنات حوا وربما قد قام فريق التحرير في دوت الخليج بالتاكد منه او التعديل علية اوالاقتباس منه او قد يكون تم نقله بالكامل ويمكنك قراءة ومتابعة مستجدادت هذا الخبر من مصدره الاساسي.
