الزواج مش حاجة سهلة ، اكيد في بداية الزواج بتبقى في لحظات رومانسية ، وبتتصلوا ببعض بشكل متكرر وتبعتوا لبعض رسايل رومانسية حلوة طول ما انتوا بعيد عن بعض ، ولكن مع مرور الوقت وفي مرحلة ما ، هتواجهوا اكيد بعض العقبات ، ولكن بنقولك ماتقلقيش ، في نصايح زوجية كتير هتساعدك على تجاوز الاوقات الصعبة دي وتعزيز زواجك ، وفي حاجات كتير لازم تتعمل عشان خلي الجواز ناجح وسعيد ، وسواء كنتي من متجوزة من فترة طويلة او لسه متجوزة جديد ، في بعض النصايح المتعلقة بالزواج اللي هتناسب اي اتنين متجوزين في اي مرحلة ، وهيستفاد منها جدا المتجوزين جديد للحفاظ على زواج صحي وسعيد وقوي ، تابعي معانا المقال بتاعنا واتعرفي على النصايح دي.

1- التواصل مع شريكك:

التواصل يعتبر من اهم عناصر الزواج الناجح ، لدرجة ان التواصل هو اللي ممكن يحدد الحالة المزاجية في العلاقة ، التواصل بيحدد مدى حيوية علاقتك وانفتاحها وصحتها ، لما تشاركي شريكك كل حاجة ، بما فيها الاسرار والحاجات الصغيرة ، ده هيساعد على الحفاظ على حيوية الروابط بينكم.

غالبا معظم الشركاء بيحسوا بالرعب مجرد ما بيسمعوا جملة "احنا محتاجين نتكلم" ولكن الكلام والتواصل بينكم هو افضل طريقة للحفاظ على قوة زواجك ، الاتصال عملية تفاعلية تضمن المشاركة النشطة للطرفين ، وده معناه ان الطرفين يكونوا متحدثين ومستمعين جيدين.

والاستماع النشط معناه عدم تشتيت انتباهك بحاجات تانية لما شريكك يحاول التعبير عن مشاعره ليكي ، اسمعيه بودنك وبقلبك ، لازم يبقى في مساحة مفتوحة بينك وبين شريكك وتسمعي كل اللي بيقوله ليكي وتبصي له وهو بيتكلم ، وممكن تعيدي عليه الكلام اللي هو بيقوله عشان تحسسيه انك منتبهه ومتفاعلة معاه ، خلي من اولوياتك دايما التواصل الفعال مع شريكك في العلاقة.

2- تحمل المسؤولية دايما:

تحمل المسؤولية عن افعالك تعتبر من بين اهم النصايح اللي لازم تعمليها في الجواز ، لازم تكوني مستعدة لاظهار النضج من خلال تحمل المسؤولية عن قراراتك وغلطاتك ، وتحمل المسؤولية مش بالسهولة دي ، خصوصا ان البشر عموما بيحاولوا يبرئوا نفسهم من اللوم على قد ما يقدروا ، ولكن هي واحدة من اسرار الزواج الناجح ، لما تتجادلي مع شريكك افتكري دايما تحمل مسؤولية افعالك ، لو قولتي او عملتي اي حاجة مؤذية او غير حساسة او ساخرة ، اعترفي ان ده حصل في لحظة توتر واظهري النضج بالاعتذار ، لو عملتي حاجة ضرت بمشاعر شريكك ، حاولي استعادة مزاجه من خلال الاعتراف بغلطك.

3- ماتستهينوش ببعض ابدا:

من قبل الجواز ، ضروري ان يكون في بينكم قدر كبير من الحب والاحترام المتبادلين ، ولكن بعد الجواز ومع مرور الوقت ممكن تبدأي تحسي ان مكانة شريكك خلاص ثابتة ، وان وجوده خلاص امر مسلم بيه ، واكيد احنا كبشر مع الوقت بنتعود على الحاجة اللي دايما قدامنا ، ولكن مع ذلك ، لازم تبذلي جهد انك ماتوصليش لنقطة اللي تتعاملي فيها مع شريكك انه امر مسلم بيه من خلال عدم احترامه او عدم تقديره ، وتبدأي في مقارنته باشخاص تانيين او تدروي على الغلطات في تصرفاته ، ولكن بدل كده احترمي شريكك دايما ، اتجنبي المقارنة ، اعملي له حاجات لطيفة تبسطه.

4- حافظي على شغف العلاقة الحميمية:

من بين العادات اللي لازم تراعيها في العلاقة الصحية هي ضرورة اعطاء الاولوية للعلاقة الحميمية مع شريكك ، العلاقة الحميمية مهمة جدا لزواج صحي ، ولكن لازم تتأكدي من تهيئة نفسك ليها ، لان لما اي طرف يحاول فرض لحظة حميمية او رومانسية والطرف التاني مش حابب ده في اللحظة دي ، فالموضوع هينتهي بشكل سيء.

للحفاظ على اثارة حياتك الحميمية ، تقدري تتكلمي عن اللي بيرضيكي ، ممكن تجربوا بعض الانشطة الحميمية الجريئة وتجربوا حاجات جديدة ومختلفة ، او لعب الادوار الخيالية ، او استخدام ادوات العلاقة الحميمية اللي هتضيف اثارة.ممكن كمان تبقي حميمية مع شريكك من خلال تصرفات تانية بسيطة زي الحضن, مسك الايد, وضع الذراعين حوالين وسطه او على كتفه, سرقة قبلات في لحظات عشوائية كده.

5- قبول الطرف التاني زي ما هو:

افتكري دايما انك اتجوزتي شريكك زي ما كان قبل كده ، وزي ما هو دلوقتي ، فماتحاوليش تغيري فيه حاجة واتقبليه زي ما هو ، لان عدم القبول هيأدي للمشاكل والشكوى المستمرة ، وخصوصا من ناحية المرأة.

مفتاح الزواج الناجح انك تعرفي ان زوجك مش مثالي ، وانك لما تقولي له باستمرار انه يغير شخصيته ، فانتي كده بتركزي بس على نقط ضعفه او مشاكله ، اتخلصي من العقلية دي وابدأي التركيز على صفاته الايجابية وقدريها بدل نقده او محاولة تغييره.

6- رتبي خروجة رومانسية:

انك اتجوزتي شريك حياتك اخيرا ، ده مش معناه ان الليالي الرومانسية هتتوقف ، لان من بين كل نصايح الزواج النقطة دي بالذات بيتم تجاهلها من الازواج ، خصوصا الازواج اللي بقالهم فترة طويلة مع بعض ، ولكن تقضية ليلة رومانسية مع بعض هتساعدكم على تقوية الروابط بينكم.

7- امدحي شريكك كتير:

كام مرة اظهرتي تقديرك لشريكك من خلال مدحه؟ كلمات بسيطة زي "انت/انتي شكلك حلو النهاردة" ، "مش هندم على حبك ابدا" ، "بحب شخصيتك جدا" هي بعض الكلمات البسيطة اللي ممكن تقوليها لشريكك.

وممكن تخلي الموضوع رومانسي اكتر بكتابة الكلمات دي في ملاحظة صغيرة وحطيها في مكان هيشوفه او يقدر يلاقيها بسهولة.

8- ابعدي عن الخيالات:

مهم انك تخلي توقعاتك الزوجية واقعية وماتكونيش ضحية للقصص الخيالية على السوشيال ميديا ، والا انك كده هتهيئي نفسك لخيبة الامل ، عيشي حياة عادية وطبيعية هتكوني سعيدة ، ماتخلقيش تخيلات تحققيها مع شريكك ، خليكي واقعية.

9- خلي عندك استعداد للتسامح:

مافيش ازواج مثاليين ، اكيد في لحظات صعبة في اي علاقة ، ولكن حاولي دايما تسوية الخلافات بسرعة ، اظهري روح متعاطفة من خلال مسامحة شريكك بالكامل ، خصوصا لما يظهرلك انه ندمان على افعاله.

10- ماتهدديش بالطلاق ابدا:

ماتهدديش ابدا بالطلاق لو انتي مش مستعدة لده ، في بعض الازواج بيحبوا يهددوا بالرغبة في الانفصال اثناء الخلافات ، ولكن الحقيقة ان الكلمات دي مؤذية وبتأثر بشكل صعب اصلاحه على العلاقة.

بالاضافة ان التهديد بالطلاق باستمرار تصرف غير ناضج ، وهتبينك ضعيفة ، ومش بتدل على الثقة والاتزان ، عشان كده بننصحك ماتستخدميش الاستراتيجية دي ابدا كأداة لحل المشاكل الزوجية لانها هتأدي للعكس.

11- تعميق الانجذاب بينكم:

الانجذاب اعمق من المظهر الجسدي ، وانتي تقدري تقرري انك تنجذبي لشريكك بس طول فترة زواجك ، اتعلمي التركيز على الصفات الجذابة في شريكك ، وماتسمحيش للشكوك او التشتيت انه يدخل جواكي ، اجتهدي في بناء اتصال ذهني مع شريكك يوصل لاعماقك ، كل الحاجات دي هتعمق الانجذاب اتجاه شريكك.

12- احتفلوا مع بعض باللحظات الصغيرة والعظيمة:

في حين انه مهم تكوني جنب شريكك في الاوقات الصعبة ، مهم كمان انكم تعترفوا بالاوقات الجيدة ، ومش ضروري يكون الانجاز كبير بالنسبة لك للاستمتاع باللحظة مع شريكك ، احتفلوا بانتصاراتكم الصغيرة ، واستخدموا اللحظة دي كفرصة لتعزيز الحب بينكم.

13- اعملوا حاجات جديدة مع بعض:

من اهم النصايح اللي ممكن تساعدك على اضافة البهجة لزواجك هو عمل حاجات جديدة مع بعض ، الملل مشكلة خطيرة بالنسبة للازواج ، وخصوصا اللي بقالهم فترة كبيرة مع بعض ، عشان كده مهم انك تخصصوا وقت لاضافة انشطة واهتمامات جديدة لعلاقتكم واللي ممكن تساعد في الحفاظ على الروابط الزوجية وتحسينها ، ممكن تروحوا في رحلات مفاجئة ، او تمارسوا اي نشاط مع بعض ، او تخططوا لاجازة في اي مكان كنت عايزين انتوا الاتنين تزوروه ، ايا كان اللي هتعملوه ، اتأكدوا انه يكن مثير ومايتنسيش.

14- احفظي سرية شريكك:

لما زوجك يثق فيكي ما تستخفيش بده ، حتى لو بان ان السر اللي شاركه معاكي صغير ومش مهم ، ولكن انتي مش عارفه اهميته بالنسبه له هو ، وبالتالي لازم تحترمي ثقته من خلال عدم الكشف عن اسراره لاصحابك او افراد عيلتك ، لان كشف الاسرار لطرف تالت ممكن تسبب توتر العلاقات الزوجية ، عشان كده لازم تعرفي ايه المهم بالنسبة لشريكك وتتجنبي عدم مناقشة الموضوع مع دايرتك المقربة.

15- خليكي مستعدة للتغيير والتكيف:

عشان الزوجين يكونوا سعدا مع بعض ، لازم يكونوا على استعداد للنمو والتغيير والتكيف ، الحياة ديناميكية ، والناس بيتطوروا ، والاحتياجات بتتغير ، والاهتمامات بتتوسع ، والعلاقات بتتطور ، عشان كده اولا كبشر وبعدين كأزواج ، نكون قادرين على التكيف مع المواقف المختلفة ، ممكن حاجة تكون مهمة بالنسبة لنا النهاردة تبقى اقل قيمة بالنسبة لنا بكره ، عشان كدده لازم نتعلم ازاي نتطور في علاقتنا وندعم بعض.

في النهاية الزواج الناجح والمستقر مش بيجي من فراغ ، لكن هو نتاج جهود كبيرة وصيانة وادارة منتظمة للعلاقة ، والنصايح اللي احنا قولناها هتساعدك على تعزيز الروابط الزوجية وهتحقق لك نتايج صحية لعلاقتكم.