ترطيب الشعر يعتبر جزء مهم في روتين العناية بالشعر ، خصوصا لو بتعاني من جفاف الشعر وتقصفه وهيشانه ، واستخدام ماسك طبيعي لترطيب الشعر هيساعدك على تغذيته وترطيبه وهيساعدك على التخلص من مشاكل الشعر المختلفة زي قشرة الراس, فروة الراس الجافة, الشعر الجاف, تساقط الشعر وغيرها من المشاكل ، والنهاردة في المقالة دي ، هنشارك معاكم 5 ماسكات لترطيب الشعر بعمق واللي هتساعدك على التخلص من الشعر الجاف والهايش والمجعد.
1- ماسك الافوكادو:
المكونات:
- 1 حبة افوكادو متوسطة الحجم.
- 2 معلقة كبيرة زيت زيتون.
- 3 معلقة كبيرة عسل.
طريقة التحضير والاستخدام:
1- قشري الافوكادو وقطعيه واخلطيه مع زيت الزيتون والعسل واضربيهم مع بعض في الخلاط لحد ما يبقى الخليط كريمي وناعم.
2- وزعي الخليط على فروة راسك وشعرك من الجذور للاطراف.
3- غطي الشعر بقبعة الاستحمام او بكيس بلاستيك.
4- سيبيه لمدة 40 – 45 دقيقة وبعدها اغسليه بالشامبو.
5- كرري الماسك مرتين في الاسبوع للحصول على افضل النتايج.
6- تقدري تعدلي في كمية المكونات حسب طول وكثافة شعرك.
الافوكادو غني بأحماض اوميجا 3 الدهنية والاحماض الامينية ، الاحماض دي بتساعد على الاحتفاظ بالرطوبة في الشعر لفترة اطول ، كمان بيحتوي على زيوت طبيعية بتساعد على ترطيب الشعر ، وزيت الزيتون غني بمضادات الاكسدة اللي بتساعد على تعزيز صحة فروة الراس وتحييد الجذور الحرة اللي بتضر الشعر وفروة الراس.
2- ماسك البيض:
المكونات:
- 1 بيضة.
- 2 معلقة كبيرة من زيت الارجان.
طريقة التحضير والاستخدام:
1- في بوله اخفقي البيضة وضيفي لها زيت الارجان اخلطيهم كويس مع بعض للحصول على خليط ناعم.
2- بلي شعرك بالماية ، وزعي الخليط على فروة راسك وباقي شعرك كله لحد الاطراف.
3- غطي شعرك بقبعة استحمام ، وسيبيه لمدة 40 دقيقة.
4- بعدها اغسلي شعرك بالشامبو وماية باردة ، لان الماية الدافية هتخلي البيض يطلع من الشعر بصعوبة.
5- كرري الماسك من 1 – 2 مرة في الاسبوع.
البيض بيحتوي على فيتامين E, B اللي بتساعد على اصلاح تلف الشعر ، وبترطب الشعر بشكل فعال ، وبالتالي بتضيف للشعر نعومة ولمعان ، وزيت الارجان بيحتوي على بعض مضادات الاكسدة القوية اللي بتساعد على علاج الاطراف المقصفة وبتمنع كمان تكسر الشعر.
3- ماسك زيت جوز الهند:
المكونات:
- 1 معلقة كبيرة من زيت جوز الهند.
- ½ كوباية زبادي.
- 1 معلقة كبيرة عسل.
طريقة التحضير والاستخدام:
1- اخلطي كل المكونات مع بعض كويس.
2- وزعي الخليط على فروة راسك والشعر كله لحد الاطراف.
3- دلكيه بلطف لمدة 2 – 3 دقايق.
4- سيبيه لمدة 30 – 40 دقيقة وبعدها اغسليه بالشامبو.
5- كرريه من 1 – 2 مرة في الاسبوع.
زيت جوز الهند بيحتوي على حمض اللوريك اللي بيتغلغل في جذع الشعرة وبيغذيها ، كمان بيحسن الدورة الدموية في فروة الراس ، وده بيحفز نمو الشعر بشكل قوي وكثيف ، الزبادي والعسل بتساعد على ترطيب الشعر بعمق ، وده هيخلي الشعر ناعم وسهل التصفيف.
4- ماسك الصبار:
المكونات:
- 2 معلقة كبيرة من جل الصبار.
- 1 معلقة كبيرة من زيت الخروع.
- 10 نقط من زيت الرزماري.
طريقة التحضير والاستخدام:
1- اخلطي كل المكونات مع بعض كويس.
2- وزعي الخليط على فروة راسك والشعر كله لحد الاطراف.
3- دلكيه لمدة 2 – 3 دقايق.
4- سيبيه لمدة 30 – 40 دقيقة وبعدها اغسليه بالشامبو.
5- كرريه من 1 – 2 مرة في الاسبوع.
جل الصبار هو مكون كثيف الماء ، وده بيوفر الترطيب اللي محتاجه الشعر ، وبيساعد على التحكم في تجعد وهيشان الشعر ، وزيت الخروع والروزماري بيساعدوا على تعزيز فعالية الماسك.
5- ماسك حليب جوز الهند:
المكونات:
- ½ كوباية من حليب جوز الهند كامل الدسم.
- 2 معلقة كبيرة زيت زيتون.
- 1 معلقة كبيرة من زيت الجوجوبا.
طريقة التحضير والاستخدام:
1- اخلطي كل المكونات مع بعض كويس.
2- وزعي الخليط على فروة راسك والشعر كله لحد الاطراف.
3- دلكيه بلطف لمدة 2 – 3 دقايق.
4- سيبيه لمدة 30 – 40 دقيقة وبعدها اغسليه بالشامبو.
5- كرريه من 1 – 2 مرة في الاسبوع.
حليب جوز الهند غني بالدهون اللي بتساعد على ترطيب الشعر ، وكمان بيعالج جفاف وتلف وتقصف الشعر ، وبيحمي فروة الراس من اضرار الجذور الحرة وبيعزز صحة بصيلات الشعر ، كمان غني بفيتامين E اللي بيساعد على تحفيز نمو الشعر بشكل قوي وصحي.
عرضنا لكم زوارنا الكرام أهم التفاصيل عن خبر 5 ماسكات لترطيب الشعر الجاف والهايش بعمق على دوت الخليج فى هذا المقال ونتمى ان نكون قدمنا لكم كافة التفاصيل بشكل واضح وبمزيد من المصداقية والشفافية واذا اردتكم متابعة المزيد من اخبارنا يمكنكم الاشتراك معنا مجانا عن طريق نظام التنبيهات الخاص بنا على متصفحكم او عبر الانضمام الى القائمة البريدية ونحن نتشوف بامدادكم بكل ما هو جديد.
كما وجب علينا بان نذكر لكم بأن هذا المحتوى منشور بالفعل على موقع بنات حوا وربما قد قام فريق التحرير في دوت الخليج بالتاكد منه او التعديل علية اوالاقتباس منه او قد يكون تم نقله بالكامل ويمكنك قراءة ومتابعة مستجدادت هذا الخبر من مصدره الاساسي.
أخبار متعلقة :