افكار مشاريع ناجحة للعمل من البيت من غير راس مال كبير

كتير من البنات ممكن يكونوا بيفكروا في الشغل من البيت ولكن محتارين في اختيار المشروع او مش عارفين يبدأوا منين ، والنهاردة من خلال موضوعنا هنقدم لكم مجموعة افكار مشاريع ناجحة للعمل من البيت وفي نفس الوقت براس مال بسيط جدا.

1- الطباعة على الشموع:

المشروع ده من المشاريع السهلة والمربحة واللي مش محتاجة تقريبا راس مال ، تقدري تطبعي على الشمع اي رسومات او جمل انتي عايزاها بسهولة او حتى صور اشخاص.

وممكن كمان تعملي صناعة الشموع نفسها ، تقدري تعملي اشكال والوان مختلفة ، وشموع معطرة.

2- صناعة الصابون:

تقدري تنوعي في الوان واشكال الصابون زي ما انتي عايزة ، وتعمليها بعطور مختلفة ، وممكن كمان تطبعي على الصابون كلمات او صور الاشخاص بتبقى من الهدايا الحلوة جدا.

3- فن التطريز (الايتامين والكنفا):

الاتنين دول تقريبا نفس الفكرة ، وبتكون عبارة عن تطريز بالخيط ، بتطبعي الرسمة وبتبدأي انك تطرزيها بالخيط ، وتقدري تعملي بيها براويز ، مفارش ، اكياس مخدات ، مجالها واسع جدا وتقدري تطلعي منها افكار كتير.

4- الكروشيه والتريكو:

الاتنين من الحاجات اللي شغلهم قريب اوي من بعض ، وهما من المشاريع السهلة واللي مش مكلفة خالص ، وتقدري تطلعي منه افكار كتير جدا.

5- صناعة العرايس:

دلوقتي منتشر جدا العرايس اللي بتكون على شكل الشخص نفسه ، تقدري تعمليه ميدالية ، او عروسة كبيرة.

6- الكيك والحلويات:

لو انتي شاطرة في صناعة الحلويات تقدري تستغلي ده وتعمليه مشروع من البيت.

كمان الطبخ لو انتي من هواه المطبخ والطبخ تقدري تستفادي من حبك للمطبخ ده وتحوليه لمشروع مربح.

7- الطباعة على المجات والعلب:

مشروع كمان مش مكلف خالص وبسيط ، هو الطباعة على الماجات, العلب, الكوبايات.

8- الرسم:

اكيد الرسم من المشاريع اللي محتاجة موهبة مش بس مجرد تعليم ، فلو انتي شاطرة في الرسم تقدري تستغلي موهبتك وتعملي مشروع ، تقدري ترسمي صور اشخاص, صور مناظر طبيعية, ممكن ترسمي على الزجاج كمان.

9- تصميم الاكسسوارات:

البنات كلهم بيحبوا الاكسسوارات ، فده من المشاريع السهلة والبسيطة واللي مش مكلفة ، وتقدري انتي تبدعي فيه وتعملي تصاميم بخامات مختلفة ومميزة.

وممكن تعملي اكسسوارات بالريزن ، والريزن من الحاجات اللي تقدري تطلعي منه كمان حاجات كتير مش بس اكسسوارات ، ممكن تعملي منه قطع زينة وصواني.

10- فن طي الورق (الاوريجامي):

من الافكار البسيطة والسهلة اللي تقدري تعمليها مشروع من البيت ، وتقدري انتي بشوية فن وابداع منك تعملي منه اشكال وافكار كتير.

11- فن الخيطString art:

ده بيكون فكرته انك بتطبعي صورة على لوح خشب وتدقي مسامير على الشكل وتشتغلي عليه بالخيط ، تقدري تعملي اي رسمة, صورة اشخاص, كلمات.

12- عجينة السيراميك والصلصال الحراري:

الاتنين قريبين من بعض في الشغل ، وتقدري تعملي منهم اشكال مختلفة وتطلعي افكار كتير.

13- مستلزمات المناسبات:

سواء حفلات عيد ميلاد, خطوبة, بيبي شاور, اي مناسبة خاصة ، تقدري تصممي الديكور بتاعها سواء ورد او بالونات او اي ديكورات مطلوبة للمناسبة, صينية كتب الكتاب, صينية البصمة.

نصايح لتنفيذ اي مشروع:

- اول حاجة اي حاجة من الافكار اللي احنا قولناها ، هتلاقي ليها فيديوهات تعليمية كتير على اليوتيوب تقدري تتفرجي وتتعلمي كل التفاصيل وتشوفي افكار ، ولو حابه تتعلمي بره هتلاقي اماكن تعليم كتير تتعلمي فيها اي صناعة يدوية ، وكمان هتفيدك في طرق التسويق وفي بعض الاماكن هي اللي بتسوق الشغل او بتشتريه منك.

- اي مشروع هتعمليه حطي فيه لمساتك وابداعك وافكارك الخاصة عشان تعملي حاجة مميزة ومختلفة ، الموضوع مش محتاج اكتر من حس فني وابداع عشان تطلعي شغل حلو وتقدري تكسبي منه بشكل كويس.

- بننصحك في البداية لاي مشروع انك تعملي لنفسك واصحابك والمقربين منك على سبيل التجربة وانك تمرني نفسك ، عشان تطلعي شغل حلو.

- مهم جدا طريقة التغليف ، تغليف الشغل بشكل حلو لان ده بيعبر عنك وعن شغلك وهتفرق جدا في مشروعك ، والالتزام بمواعيد التسليم على قد ما تقدري.

- اخر حاجة واهم حاجة هي جانب التسويق ، اولا اهتمي جدا بتصوير شغلك بطريقة حلوة لان طريقة العرض بتفرق جدا ، مجرد ما تبقي متمكنة وشغلك بيطلع مظبوط اعملي صفحة على الفيسبوك, الانستجرام وسوقي لشغلك.