12 طريقة فعالة وآمنة لخسارة الوزن للاطفال

في اطفال كتير بيعانوا من مشكلة الوزن الزايد ، وخسارة الوزن بالنسبة للاطفال بتكون اصعب لانهم معندهمش القدرة اوي في التحكم في شهيتهم ، بالاضافة انه بيكونوا في مرحلة نمو ومحتاجين نظام غذائي صحي ، عشان كده النهاردة من خلال موضوعنا هنشارك معاكم بعض النصايح المفيدة لمساعدة اطفالك على انقاص وزنهم ، لان زيادة الوزن او السمنة ممكن تعرض الاطفال لمشاكل صحية كتير على المدى الطويل ، بالاضافة انها ممكن تأثر على النمو والتطور السليم للطفل وتأثرهم على صحتهم العقلية.

اخطاء شائعة في خسارة الوزن:

هنتعرف الاول على بعض الاخطاء الشائعة في انقاص الوزن اللي ممكن تعطل عملية انقاص الوزن لطفلك.

1- تحديد اهداف غير واقعية:

خطط انقاص الوزن مش هتبقى فعالة الا لو حددتي اهدافك بشكل صحيح ، على سبيل المثال ، قبل ما تحددي طفلك محتاج يخس كام كيلو ، حاولي انك تتحكمي الاول في زيادة وزنه ، خدي خطوات صغيرة وافتكري ان كل خطوة ليها اهميتها.

2- البحث عن فقدان الوزن السريع:

فقدان الوزن السريع اكيد بيكون مغري ، ولكن هو مش صحي ، ممكن تبقي حابه تعملي كل ما هو ممكن في وقت واحد لمساعدة اطفالك لخسارة وزنهم بشكل سريع ، بانك تقيديهم في الاكل بشكل قاسي وتضغطي عليهم لممارسة الرياضة ، لكن افتكري ان ده هيجيب نتايج عكسية.عمل تغييرات على النظام الغذائي او عادات الاكل واسلوب الحياة للطفل في وقت واحد ، ده هيخلي رحلة انقاص الوزن مرهقة وصعبة ، وده هيأدي لاحباط طفلك.

3- ممارسة انماط الاكل غير المنتظمة:

بعض الاطفال والمراهقين ممكن يتخطوا بعض الوجبات ، او ياكلوا كميات اقل من الاكل ، او يمشوا على انظمة غذائية مقيدة لانقاص الوزن ، وده ممكن يأدي فعلا لانقاص الوزن ، ولكن ممكن يأدي كمان لابطاء عملية التمثيل الغذائي ويسبب خطر نقص التغذية على المدى الطويل ، بالاضافة كمان ، ان مجرد ما يبدأ الطفل في الاكل بشكل طبيعي ، وزنه هيزيد مرة تانية ، وده هيخلي كل الجهود اللي اتعملت من غير فايدة.

4- اتباع نظام غذائي غير محدد:

نظام انقاص الوزن لازم ياخد في الاعتبار عمر الشخص وصحته واحتياجاته الخاصة ، وغالبا الاطفال والمراهقين بيمشوا على انظمة غذائية عشوائية من على الانترنت ، ولان الانظمة دي بتبقى مش مناسبة مع الاحتياجات الغذائية للشخص ، ممكن تسبب ضرر اكتر من نفعها ، وكمان مش بتوفر التغذية المطلوبة.

5- تجنب النشاط البدني:

الاطفال من سن 6 – 17 سنة بيحتاجوا ل 60 دقيقة من النشاط البدني متوسط لقوي الشدة كل يوم ، ولو ده محصلش مهما كان النظام الغذائي لانقاص الوزن مش هيأدي لنتايج ، النشاط البدني المنتظم مع النظام الغذائي الصحي هيساعد في انقاص الوزن بشكل فعال.

6- انخفاض الدافع:

الاطفال بيحتاجوا للتشجيع الايجابي عشان يواصلوا رحلة انقاص الوزن ، لان احيانا ممكن يجي وقت طفلك يفقد الاهتمام او يحس بالاحباط ، عشان كده عليكي انك تدعمي طفلك وتحفزيه وتعلميه اهمية الصبر والاصرار وكافئية على تقدمه في رحلة انقاص الوزن ، ممكن البيت كله كمان يمشي على نظام غذائي مشترك وروتين صحي لضرب مثال صحيح لطفلك.

نصايح لمساعدة طفلك على خسارة الوزن:

1- حددي اهداف واقعية قصيرة وطويلة المدى:

الافضل انك تستشيري دكتور اطفال لتحديد اجمالي الوزن اللي طفلك محتاجه ومحتاج وقت قد ايه لتحقيقه ، وحطي في اعتبارك الاهداف قصيرة المدى وطويلة المدى ، على سبيل المثال ، الهدف قصير المدى ممكن يكون التوقف عن زيادة الوزن في خلال 15 يوم او شهر ، والهدف ده المفروض يأدي لهدف طفلك طويل المدى وهو فقدان حوالي 10 كجم في خلال 4 – 5 شهور.

2- اتقدمي بالتدريج للهدف:

اختاري حاجة واحدة في الاسبوع اشتغلي على تحقيقه ، على سبيل المثال ، لمدة اسبوع ممكن توجهي طفلك وتساعديه على استبدال كل المشروبات المحلاه زي العصير والصودا ، بمنتجات الالبان قليلة الدسم ، بما فيهم اللبن الرايب ، التقدم التدريجي هيجي بالانتظام.

3- حددي نظام غذائي لطفلك:

اكلي اطفالك وجبات متوازنة تشمل اطعمة متنوعة ، اتحكمي في كمية وجباتهم بحيث انهم يحصلوا على كل العناصر الغذائية الضرورية من الاطعمة من غير زيادة في الوزن ، الاطفال والمراهقين بيحتاجوا الى ما يعادل 2 – 4 كوبايات من الخضروات ، وما يعادل 2 – 2 ½ كوباية من الفاكهة ، وما يعادل 6 – 10 كوبايات من الحبوب ، وما يعادل 2 كوبايات من منتجات الالبان كل اسبوع.

4- اتأكدي ان طفلك مش بيفوت وجبة الفطار:

الفطار هو اول وجبة واهم وجبة في اليوم اللي بتدي الطفل الطاقة والعناصر الغذائية اللازمة لاداء وظائف جسمه لحد ما ياكل وجبته اللي بعد كده ، ولكن الدراسات بتشير ان بنسبة 8 – 12% تقريبا من الاطفال في سن المدرسة بيفوتوا وجبة الفطار ، وتخطي الوجبات مش هيأدي بس لنقص التغذية ، ولكن هيأدي كمان لابطاء عملية التمثيل الغذائي.

5- احرصي على توفير الوجبات الخفيفة والاطعمة الصحية في متناول الايد:

ابعدي الاطعمة غير الصحية والوجبات السريعة من قدام اطفالك واستبدليها باكلات صحية زي كوباية من التوت او العنب ، او كوباية من الخضار مع الحمص ، او ربع كوباية تونة ملفوفة في خس ، ده هيساعد طفلك بالتدريج على انه ياخد اختيارات غذائية صحيحة.

6- حددي انشطتهم حسب احتياجاتهم واهتمامتهم:

مهم انك تشركي طفلك في نشاط بدني حسب اهتماماته ، في اطفال بتحب الجري ، وغيرهم بيحب السباحة او كورة القدم ، افهمي اهتمامات طفلك وخططي لانشطة انقاص الوزن اللي يعملها حسب اهتمامه.

7- الامتناع عن اتباع نظام غذائي صارم او مقيد بالسعرات الحرارية:

لو ماطلبش منك دكتور الاطفال او اخصائي التغذية انك تعملي ده ، ماتسمحيش لطفلك باتباع نظام غذائي صارم او مقيد بالسعرات الحرارية ، لان الانظمة الغذائية دي مش متوازنة من الناحية الغذائية ، وه بيشكل خطر نقص العناصر الغذائية ، بالاضافة انها بتبطيء عملية التمثيل الغذائي للطفل ، وده هيخلي فقدان الوزن اكتر صعوبة ، فقدان الوزن ضروري ولكن مش على حساب نقص التغذية.

8- ماتستخدميش ابدا مكملات او حبوب انقاص الوزن للاطفال:

ماتستخدميش ابدا مكملات انقاص الوزن او حبوب انقاص الوزن للاطفال ، حتى لو بيفقدوا الوزن بشكل بطيء جدا او مش بيفقدوا وزن خالص ، لان سلامة مكملات وحبوب انقاص الوزن للاطفال مش معروفة ، بالاضافة انها ممكن يبقى ليها آثار جانبية على المدى الطويل ممكن تأثر على نمو الطفل.

9- احتفظي بسجل للتغييرات الغذائية والنشاط البدني:

احتفظي بمذكرة او سجل تدوني فيها كل الجهود اللي الطفل بيعملها لانقاص وزنه ، وشاركي السجل ده مع دكتور الاطفال وناقشي معاه ممكن تعملي ايه لتحسين خطة انقاص الوزن ، ده ممكن يساعدك تعرفي التقصير فين وتصححيه على طول.

10- خليكي داعمة لطفلك:

افهمي مشاكل فقدان الوزن اللي بيعاني منها طفلك وطمنيه انك بتدعميه ، كل طفل بيواجه مشاكل مختلفة في انقاص الوزن ، اسمعي طفلك وساعديه على تحقيق هدفه.

11- حطي المثال الصحيح:

كعيلة ، الافضل ان كلكم تمشوا على نظام غذائي صحي واسلوب حياة نشيط ، لان الاطفال بيقلدوا الاكبر منهم ، وبالتالي مارسوا اللي بتنصحوا بيه ، وامشوا على النظام الغذائي اللي عايزين طفلكم يمشي عليه ، وده ينطبق على تصرفاتكم جوه البيت او بره البيت ، على سبيل المثال ، ممكن كلكم تطلبوا اكل صحي لو هتاكلوا بره في اي مطعم.

12- اطلبي المساعدة المهنية او التوجيه من الخبراء:

اطلبي المساعدة من اخصائي تغذية او مدرب لانقاص الوزن ، هيساعدوكي بوضع خطة لاتقاص الوزن لطفلك حسب عمره وصحته العامة ، بالاضافة انهم هيقدموا النصيحة والتحفيز اللي محتاجه طفلك لفهم حالته والتصرف بالتزام معاه ، مهم جدا لطفلك انك تقدمي له الدعم العائلي الكافي في رحلة انقاص الوزن ، ده هيساعده بدوره على تعزيز احترامه لذاته وثقته بنفسه وتعلم الصبر والاصرار.